Аңдатпа
Мақалада жалпы білім беру ұйымдарында ерекше білім беру қажеттіліктері (ЕБҚ) бар оқушылардың әлеуметтік бейімделуін, оқу жетістіктерін және жан-жақты дамуын қамтамасыз етуге бағытталған инклюзивті білім беру экожүйесін дамытуға арналған негізгі әдіснамалық негіздер қарастырылады. Экожүйе педагогикалық, ұйымдастырушылық-басқарушылық, цифрлық, кадрлық және социомәдени өзара байланысты құрамдастардың жиынтығы ретінде түсіндіріледі, олар білім алушылардың жеке ерекшеліктерін ескере отырып, үздіксіз қолдауды қамтамасыз етеді. Мұндай жүйені құрудың іргелі қағидаттары ретінде тұтастық, жекелендіру, пәнаралық өзара ықпалдастық және цифрлық трансформация анықталған. Бұл қағидаттардың инклюзияға көзқарасты өзгертудегі маңызы ерекше атап өтіледі. Мақалада қазіргі заманғы сын-қатерлер, бар ресурстар және инклюзивті тәжірибелердің тиімділігіне әсер ететін институционалдық тетіктер талданады. Ерекше назар ведомствоаралық үйлестіруге, цифрлық шешімдерді енгізуге және педагог кадрларды кәсіби даярлауға аударылған. Материал инклюзивті білім беру саласындағы зерттеушілерге, мұғалімдерге, қолдау көрсету мамандарына және тұрақты инклюзивті модельдерді қалыптастыруға мүдделі білім саясатын жүргізушілерге арналған.